Тунда бўлиб ўтган Лондон дербисида "Арсенал" қаршисидаги рақиб — "Вест Хэм"дан устун эди. Четлатишгача ҳам устун эди. Ва балки, "қизил"дан сўнг Мойес жамоаси ўзини янада эҳтиёткор тутиб, камроқ гол ўтказган бўлиши мумкин. Аслида Цоуфал майдонни эрта тарк этмаганда Артета жамоаси янада самаралироқ ўйнаши ҳам мумкин эди, демоқчиман. Тан оламан, бу "агар-агарлар назарияси" ва у факт ўрнига ўтмайди асло. Бироқ бир факт бор. "Арсенал" тўртликда! Бу буюк қайтиш.

Сўнгги йиллардаги "Арсенал" учун 17-турдан кейин 4-ўринда бўлиш ростмана яхши натижа. Ахир 2016-17 йиллар мавсумидан буён илк бор 17 турдан сўнг Лондон жамоаси 4-ўринда. Ўшанда клуб бош мураббийи ким эди эслайсизми? Ҳа, Арсен Венгер. Бугун ФИФАда футболни ўзгартираман деб юрган Венгернинг устидан ҳатто клубнинг содиқ мухлислари ҳам куларди у вақтлар. Аммо у кетгач клуб пастга шўнғиганини кўрдик. 4-ўрин энди орзу бўлиб қолди шонли жамоага.

"Арсенал"нинг адекват мухлисларга савол, жамоангиз жорий мавсум 4-ўринни эгалласа, бундан қанчалик қувонасиз?

Билмадим, менимча АПЛдаги ҳозирги рақобат билан нисбат олинса, "Арсенал" тўртинчи бўлиши улкан натижа бўларди ва Артета ниҳоят катта мураббий эканини исботлаган бўларди. Ҳа, Артета Сульшердан устун эканини кўрсатди аллақачон. Энди навбат кейинги босқичга. Тўртлик учун курашда Антонио Конте, Ральф Рангник, Девид Мойес ва эҳтимол Брендан Роджерс ҳам бор. Анави уч нафар "ўзга сайёралик" мураббийни бу сафга аралаштирмаймиз, майлими?!

Шу ўринда иккита муҳим қўшимча бор. Биринчидан, аслида "Тоттенҳем" қолдирилган 3 (!) ўйинида юз фоизлик натижа қайд этса 4-ўринга кўтарилади. Лекин ҳатто шунда ҳам мавсумни мағлибиятлар билан бошлаган "Арсенал" учун ҳозирги натижа, менинг наздимда, жуда ажойиб.

Иккинчидан, клубнинг бу натижалари биринчи навбатда Аарон Ремсдейл билан боғлиқ экани бу узоқ истиқбол учун ижобий жиҳатми ёки салбий? Менимча, салбий. Англиялик дарвозабон "Манчестер Сити"га қарши 5:0 ҳисобидаги мағлубиятдан кейин Ленонинг ўрнини эгаллади ва бу ўринни қайтиб бермади. Дарвоқе, бу мавсум унинг барча турнирлардаги "қуруқ" ўйинлари сони 10 тага (!) етди. Аарон ҳақида кейинги постлардан батафсил ёзаман.

Ҳозир нима ҳам дердим, кузатамиз...

Ориф Толипов.