«Фиорентина» «Арсенал» ярим ҳимоячиси Лукас Торрейрани тўлиқ сотиб олиш устида ишламоқда.
FirenzeViola нашри хабарига кўра, уругвайлик футболчининг вакили бугун «Фиорентина» офисига ташриф буюриб, клуб раҳбарияти билан музокара ўтказди. Томонлар ҳали ҳам келишувга эриша олишмаяпти, бироқ масала олдинга силжий бошлади. Қайд этилишича, «бинафшаранглилар» «Арсенал» билан трансфер суммасини келишиб олишган. Тахминларга кўра, бу ўн беш миллион евро бўлиши мумкин.
Торрейра жорий мавсумда «Фиорентина» сафида барча турнирлар доирасида 25 та ўйинда майдонга тушиб, 2 та гол урди ва битта голли узатмани амалга оширди.