“Рома” ярим ҳимоячиси Жордан Верету фаолиятини Англия Премьер-лигасида давом эттириши мумкин.

TeamTalk нашрининг Correira dello Sport нашрига таяниб хабар беришича, 29 ёшли футболчининг хизматларига “Ньюкасл Юнайтед” клуби қизиқиш билдирмоқда.

Манбанинг хабарига кўра, "ҳаккалар" франциялик футболчини ёзда ўз сафига қўшиб олмоқчи. "Ньюкасл"дан ташқари, "Тоттенхэм" ва "Милан" ҳам футболчини кузатиб боришмоқда, аммо "янги бойлар" Верету учун курашда фаворит ҳисобланади.

Маълумот учун, ярим ҳимоячи 2020 йилдан буён "Рома"да тўп сурмоқда, у "Фиорентина"дан 17,5 миллион евро эвазига римликлар сафига кўчиб ўтган.

Ўйинчининг клуб билан шартномаси 2024 йилнинг июнигача амал қилади. Transfermarkt маълумотларига кўра, футболчининг бозор қиймати 22 миллион еврони ташкил этади.

Италия чемпионатининг жорий мавсумида Верету 28 та ўйинда майдонга тушиб, 4 та гол урган ва 7 та голли узатмани амалга оширган.