ЎзПФЛ келишилган ўйинларга қарши кураш бўйича Ўзбекистон футболчилари уюшмаси билан яқиндан ҳамкорлик олиб бормоқда.

Хусусан, ҳамкорлик доирасида Халқаро Профессионал футболчилар ассоциациялари федерацияси (FIFPRO) томонидан ишлаб чиқилган Players Red Button (футболчиларнинг қизил тугмаси) иловаси эндиликда ўзбекистонлик футболчилар томонидан ҳам фойдаланилади.

Red Button иловаси смартфонларга ўрнатилади ва ундан фақатгина профессионал футболчилар фойдаланади. Илова ёрдамида футболчи келишилган ўйинлар билан боғлиқ ҳолат ёки маълумотларни сезган тақдирда, бу ҳақида исми ошкор этилмасдан, хавфсиз ва аноним тарзда хабар бериш имкониятига эга бўлади.

Шундан келиб чиқиб, ЎзПФЛ Футболчилар уюшмаси билан ҳамкорликда Ишчи гуруҳ ташкил қилди. Ушбу ишчи гуруҳ Players Red Button иловаси ҳақида клублар футболчиларига тушунтириш ишларини олиб бориб, футболчиларга ушбу иловадан фойдаланиш кўникмаларини ўргатмоқда.

Ҳозирга қадар бундай учрашув “Пахтакор”, “Динамо” ҳамда “Қизилқум” жамоалари аъзолари билан ўтказилди.