Ўзбекистон кубоги мусобақасининг гуруҳ босқичи 2-туридан ўрин олган "Нефтчи" - "Қизилқум" (0:1) учрашувидан сўнг мезбонлар бош мураббийи Илҳом Мўминжонов матбуот анжуманида иштирок этди.
Бугунги ўйинда жуда кўплаб хавфли вазиятларни яратдик, йигитларимиз ҳам яхши ҳаракат қилишди, аммо, гол урмасанг, ютуқ бўлмайди. Қўпол ҳатолар эвазига бугун мағлуб бўлдик.Бундан кейин кубок ўйинларидаги юришимиз анча мушкул бўлади. Энди мусобақанинг навбатдаги босқичига чиқишимиз учун фақат ғалаба қозонишимиз зарур.
Етакчи футболчимиз Лутфулла Тўраевнинг жароҳати бор. Лекин, ҳозирда унинг позициясида Аброр Исмоилов билан Сирожиддин Қўзиев яхши ўйин намойиш этяпти, деб ўйлайман. Майдон марказида ишонч билан ҳаракатлансак, ҳужумда бироз оқсаяпмиз ва кўп ҳолларда ҳатоликка йўл қўйяпмиз. Футболда эса кам ҳато қилган жамоа ютади.
Кейинги тур баҳсларида аста-секин яхши натижаларга эришиб, чемпионатимиздаги ўйинларда ғалаба қозонишимиз керак,-дейди бош мураббий.