Аёллар ўртасидаги жаҳон чемпионатига оз вақт қолмоқда. Ўзбекистон бокс федерацияси матбуот хизмати терма жамоамиз аъзоларининг фикрларини эътиборингизга ҳавола қилади.

Бу сафар биз Олимпия ўйинлари иштирокчиси, Ўзбекистоннинг кўп карра чемпиони Турсуной Раҳимованинг фикрлари билан қизиқдик.

"Насиб қилса, катталар ўртасидаги жаҳон чемпионатида учинчи маротаба қатнашаман. Бокс мен учун шунчаки хобби эмас - ҳаётим мазмуни ҳисобланади. Спортни тарк этишни ўйласам юрагим орқага тортади, аммо шуни биламанки, барча нарсани ўз вақти-соати бор.

Туркиядаги жаҳон чемпионатига тайёргарлик юқори даражада ўтмоқда. Бундай машғулотлардан сўнг юксак натижаларни қайд этишимиз шарт. Асосий эътибор жисмоний ва руҳий тайёргарликка қаратилган. Тайёргарлик жараёнига психолог ҳам бириктирилган. Бу эса ўз навбатида бизга катта ёрдам бермоқда.

Жаҳон чемпионатидаги мақсадим - олтин медални қўлга киритишдир. Ушбу мусобақани узоқ вақт кутдим ва баҳсларга қаттиқ тайёргарлик билан кетяпман. Насиб қилса, олтин медаль билан қайтаман.

Бўлажак чемпионатда мен учун Туркия ва Ҳиндистон терма жамоалари аъзолари асосий рақиб бўлиши кутилмоқда. Шунингдек, мусобақанинг адолатли ўтиши ҳам муҳим аҳамиятга эга", - деди Турсуной Раҳимова.

Ўзбекистон бокс федерацияси матбуот хизмати