"Реал Мадрид" ёзги трансфер ойнасида парижликлар билан шартномасини 2025 йилгача узайтирган "ПСЖ" ҳужумчиси Килиан Мбаппенинг трансфери бузилганидан кейин биринчи навбатдаги трансфер мақсади ҳақида қарор қабул қилди, деб хабар беради Marca.
Манбага кўра, "Қироллик клуби" "Монако" ярим ҳимоячиси Аурелиен Тчуамени билан шартнома имзоламоқчи.
22 ёшли француз 2020 йилда "Монако"га 18 миллион евро эвазига "Бордо" сафидан бориб қўшилган эди. Transfermarkt ярим ҳимоячининг ҳозирги бозор қийматини 40 миллион еврога баҳолаган.
Тчуамени жорий мавсумда барча турнирларда 50 та ўйинда майдонга тушиб, 5 та гол урди ва 3 та голли узатмани амалга оширди. Футболчининг “Монако” билан шартномаси 2024 йилда якунига етади.