Мадриднинг “Атлетико” клуби ярим ҳимоячиси Тома Лемар ёзда АПЛга ўтиши мумкин. "Арсенал" франциялик вингерни сотиб олишни режалаштирмоқда.

Todofichajes'нинг хабарига кўра, футболчи аллақачон “канонирлар” сафига ўтишга тайёрлигини маълум қилган. Лемарнинг "матрасчилар" билан шартномаси тугашига бир йил қолди ва шартномани икки марта узайтириш таклифини рад этди. “Атлетико” футболчини кейинги йили текинга йўқотгандан кўра, уни сотиши мантиқийроқ бўларди. Испанлар Томани 40 миллион еврога баҳоламоқда.

26 ёшли франциялик футболчи 2018 йилнинг июльидан буён Мадриднинг “Атлетико” клубида ўйнайди. Ўтган мавсумда у Ла Лиганинг 24 ўйинида 4 та гол урди ва 5 та голли узатмани амалга оширди.