"Барселона" Мемфис Депайни "Севилья" ҳимоячиси Жюл Кунде шартномасига қўшмоқчи.

AS нашри хабарига кўра, Усмон Дембеле билан янги шартнома имзоланганидан сўнг, Рафинья Диаснинг трансфери ва "Бавария"дан Роберт Левандовскининг эҳтимолий трансфери, Каталония клубининг режаларида Депайга ўрин йўқлигини кўрсатмоқда.

"Барса" Мемфисни "Севилья" билан марказий ҳимоячи Жюл Кунде бўйича келишувга қўшмоқчи. Хабар қилинишича, каталониялик футболчилардан бири келишувга киритилса, Андалусия клуби футболчининг нархини пасайтириши мумкин.

Депайнинг "Барса" билан шартномаси бир йилдан кейин тугайди. Ҳужумчи яхши обрўга эга бўлса-да, унинг учун катта сумма тўлашга тайёр бўлган клубни топиш қийин бўлади.

"Барса" ҳужумчига 20 миллион евролик таклифни қабул қилишини айтди. Шу билан бирга, клуб унинг учун бундай суммани олиш ниҳоятда қийин бўлишини тушуниб турибди.

28 ёшли футболчи ўтган мавсумда Каталония клуби сафида барча турнирларда 37 ўйинда 13 та гол урди ва 2 та голли узатмани амалга оширди.