"Манчестер Юнайтед"нинг португалиялик ҳужумчиси Криштиану Роналду "Интер Майами"га ўтиши мумкин, деб хабар беради Daily Star.
Нашрнинг ёзишича, Дэвид Бекхэм клуби португалияликга бир мавсум учун 34 миллион евро тўлашга тайёр. Собиқ англиялик футболчи аллақачон ҳужумчи билан эҳтимолий трансферни муҳокама қилган.
ОАВ Роналду "Манчестер Юнайтед"ни тарк этмоқчи, бироқ Европанинг бирорта клуби футболчига қизиқарли таклиф билан чиқишга тайёр эмаслиги ҳақида ёзишган.
37 ёшли португалиялик футболчи 2021 йилнинг августида "Манчестер Юнайтед"га ўтган эди. У жорий мавсумда “қизил иблислар” сафида 9 та ўйинда майдонга тушиб, 1 та гол урди ва битта голли узатмани амалга оширди.
