"Манчестер Юнайтед" футболчилари сўнгги уч йилда илк бор мухлислар билан юзма-юз мулоқот қилди. Клуб футболчилари машғулотлар майдонига ташриф буюрган мухлисларни хурсанд бўлишига сабабчи бўлди. Ўйинчилар ичида 37 ёшли Роналду ҳам бор эди. Португалиялик бошқа жамоадошлари билан асосини имконияти чекланган болалар (шунингдек, ақлий заифлар ҳам) ташкил этган мухлислар билан кўришди.
Таъкидлаш жоизки, ушбу учрашув 2019 йилдан бери жонли тарзда ўтган митингларнинг дастлабкиси эди. Пандемия сабабли "МЮ" футболчилари бундай йиғинларга қатнашиш борасида нофаол бўлиб келган.

Жамоа сардори Харри Магуайр ҳам тадбир иштирокчиси бўлди. Бу ҳақида марказий ҳимоячи ўз фикрлари билан ўртоқлашар экан, жумладан шундай дейди: "Биз бундай воқеалар клуб учун нимани англатишини жуда яхши биламиз. Мен бу жамоага келганим заҳотиёқ ижтимоий муҳит, мухлислар қўллови ва уларнинг ҳислари қанчалик биз учун муҳимлигини яхши англаганман. Менимча, бир инсон ўлароқ, бирор кишининг юзига табассум югуртириб, уни бахтли қилишдан кучлироқ қувоч бўлмаса керак. Бизлар мана шундай кунларни жуда ҳам соғингандик. Мухлислар қайтганини кўриш эса ҳақиқий роҳат".

Ушбу учрашувда, шунингдек, Маркус Рэшфорд, Кристиан Эриксен, Каземиро, Де Хеа ва Лисандро Мартинеслар ҳам иштирок этишган. Мухлислар футболчилар билан кўришиб қолмасдан, стадион, база ҳамда Каррингтон бўйлаб сайр ҳам қилишди. Бу нарса мухлислар, хусусан, болажонларга ўз қаҳрамонларини кўриш ва улар билан суратга тушиш имконини ҳам тақдим этди. Боз, устига "Эвертон"га қарши ғалабадан кейин "МЮ" футболчилари аъло кайфият билан ушбу тадбирда иштирок этган. Роналду эса сўнгги баҳсда захирадан майдонга тушиб, ўзининг фаолиятидаги 700-голини уришга эришган эди. Ушбу гол ғалабага сабабчи бўлди.

Эрик тен Хаг эса бу орқали "Эвертон"нинг 6 та ўйинлик мағлубиятсиз сериясига якун ясади. Олдинроқ "МЮ" "Арсенал"ни мағлуб этиб, лондонликларнинг ғалабали сериясига нуқта қўйган эди. Келаётган тур "МЮ" учун АПЛда "Ньюкасл"га қарши кечади.

ИСМАТОВ Ж.