"Ювентус" ва Франция терма жамоаси ярим ҳимоячиси Поль Погба жамоанинг умумий гуруҳига қайтиши мумкин.

L'Equipe хабарига кўра, ярим ҳимоячи менискус жароҳатидан тикланиш жараёнини якунламоқда ва келаси ҳафтаданоқ умумий гуруҳдаги машғулотларни давом эттириши мумкин. У ҳозирча индивидуал дастур билан шуғулланмоқда ва оғриқсиз югуриш машқларини бажармоқда.

Қайд этилишича, 29 ёшли футболчи ноябрь ойи бошида ёки октябрь ойи охирида майдонга қайтиши мумкин. Шу муносабат билан у Франция терма жамоасининг Қатарда бўлиб ўтадиган 2022 йилги жаҳон чемпионати учун қайдномасига кириш имкониятини сақлаб қолди.

Погба шу ёзда “Ювентус”га текинга ўтди ва клуб билан 4 йиллик шартнома имзолади. У ҳали жамоа сафида бирорта ҳам расмий ўйин ўтказмаган.

Франция терма жамоаси бош мураббийи Дидье Дешам Погбанинг ЖЧ-2022 учун терма жамоага қўшилиши учун ўз формасини тиклаши кераклигини айтди.