"Ливерпуль" ҳужумчиси Муҳаммад Салоҳ Англия чемпионатининг 15-турида "Тоттенхэм"га қарши ўйиндаги ғалаба (2:1) ҳақида фикр билдирди. Бу учрашувда Салоҳ дубль қайд этди.
“Биз футбол ўйнадик ва иккита гол уришга муваффақ бўлдик, аммо иккинчи бўлимда гол уришимиз мумкин эди, деб ўйлайман, аммо омадимиз келмади. Энг муҳими, уч очкони қўлга кирита олдик. "Тоттенхэм" ҳар доим қийин рақиб, хоҳ меҳмонда, хоҳ уйда ўйнасак. Лекин мен доим бор эътиборимни ўйинга қаратаман ва жамоага фойдам тегишга ҳаракат қиламан. Бугун мен буни уддаладим", - дея Салоҳнинг сўзларини келтиради "Ливерпуль" расмий сайти.
Юрген Клопп шогирдлари 19 очко жамғариб, турнир жадвалида саккизинчи ўринга кўтарилиб олди. 26 очкога эга “Тоттенхэм” эса тўртинчи ўринда қолди.
