Футбол бўйича Россия терма жамоасининг расмий телеграм-каналида бош мураббий Валерий Карпиннинг Тошкент меҳмонхоналаридан бирида Италиянинг “Рома” клуби ва Ўзбекистон миллий терма жамоаси ҳужумчиси Элдор Шомуродов билан учрашгани акс этган видео намойиш этилди.
Учрашув Россия ва Ўзбекистон терма жамоалари ўртасидаги ўртоқлик учрашувидан икки кун олдин бўлиб ўтди. Шомуродов бунгача Карпин бошчилигидаги “Ростов”да ўйнаган. Россия клубида ўтказган тўрт мавсум давомида Ўзбекистон терма жамоаси ҳужумчиси 91 ўйин ўтказиб, 18 гол ва 12 голга ассистентлик қилган. Шомуродов 2020 йилда "Ростов"ни тарк этганди. Форвард “Женоа”га 9 миллион еврога сотилди.