Микель Артета жамоаси бугун "Астон Вилла" майдонига сафар қилади. Испаниялик мутахассис "Арсенал"ни яна чемпионлик пойгасига қайтариш учун ҳаракат қилмоқда. Бунинг учун бугунги учрашувда қандай бўлмасин ғалабага эришиш керак бўлади.
"Арсенал" Унаи Эмерини истеъфога чиқарганига уч йилдан ошди. Аммо унинг даврида қўлдан чиқарилган йирик совриннинг ақлий заҳми ҳали ҳам кетгани йўқ. Ўз навбатида Эмери ҳам бунинг учун ўзининг собиқ жамоасидан ўч олишга ҳаракат қилади. Бундан икки йил олдин у "Арсенал"ни "Вильярреал" билан ЕЛда мағлуб этиб, қайсидир маънода ўз аламини олган. Аммо ўша икки даврали баҳс пандемия сабабли ёпиқ эшиклар ортида кечганди. Бугун эса ўйин мухлислар қаршисида бўлади. Шу билан бир пайтда Эмерининг юртдоши бўлган Артета унга доимо ҳурмат кўзи билан қарашини билдириб келади. У бу ҳақида шундай деганди: "Унаи ажойиб мураббий ва доимо рақиблар учун катта муаммо туғдира олган. Мен доимо унинг бошқарган жамоаларига ҳурмат кўзи билан қараганман".
Аммо бу ҳурмат ўз вақтида Микель Артетани Эмерининг "Арсенал"да яратган барча нарсасини бир бошдан бузиб ташлашига монеълик қилмаган. Айни дамда Эмерининг "Арсенал" билан ўтказган сўнгги ўйини (2019 йил, ноябрь)даги асосий таркибидан фақат Киран Тирни қолган холос. Аммо шотландиялик ҳимоячи шу кунларда захира ўриндиғида ўз вақтини ўтказмоқда. Кийиниш хонасида ёмон муҳит яратган (Артета қарашига кўра) қолган барча футболчи йўқотилганди. Хусусан, Месут Ўзил, Пьер-Эмерик Обамеянг, Давид Луиз, Александер Ляказетт, Эктор Бельерин, Калум Чеймберс ва Сократислар жамоани текинга тарк этган. Улар ичидан айримларига клубдан кетиши учун ҳатто пул ҳам тўланганди. Шунингдек, Бернд Лено, Маттео Гендузи ва Лукас Торрейралар арзимаган пулга сотиб юборилди.
Аммо Эмери давридаги ҳамма ҳам Артета режими даврида ташқарига "улоқтирилган"и йўқ. Масалан, Салиба, Мартинелли, Сака ва Смит-Роулар айнан Эмери даврида жамоадаги дебютларини нишонлаган.
Ҳозирги кунга келиб айнан ўша номлар Артетанинг янги лойиҳасида асосий устунларга айланди. Бироқ, сўнгги учта турдаги кетма-кет муваффақиятсизликлар фонида "Манчестер Сити" чемпионлик курашида яна ўз ўрнига қайтди. Бундан атиги бир ой илгари "Арсенал" "Тоттенхэм" устидан ғалаба қилиб, энг яқин таъқибчисидан саккиз очкога ўзиб кетганди. Энди эса, чоршанба кунидаги мағлубият, жамоани фаворит даражасидан анча пастга тушириб қўйди. "Арсенал" қарши ҳужумдан ва стандарт вазиятлардан унумли фойдаланишни биладиган рақиблар учун тайёр ўлжа сифатида намоён бўла бошлади. Масалан, "Эвертон", "Брентфорд" ва "Манчестер Сити" айнан мана шу услуб орқали тўпчиларни ер тишлатганди. Микель Артета бугун бирмингемликлардан ҳам айнан шуни кутиши керак.
Ўз жамоасининг сўнгги пайтдаги натижалари ҳақида Микель Артета шундай дейди: "Биз тўп назорати ва ўйинни ўзимизники қилишни ёқтирадиган жамоамиз. Афсуски, ҳозирги натижаларимиз рақиб жарима майдончаси ичида унумли ҳаракат қила олмаганимиз сабабли юзага келмоқда. Биз нимани хоҳлаётганимизни ва даражамизни яхши биламиз. Натижа бизга қарши бўлган бўлсада, "Манчестер Сити" билан баҳсдан олган ижобий хулосаларимиз ҳам бўлди. Мен мана шу ўйинда ўз кўзларим билан йигитларни улғайганини кўрдим. Буни ўйиндан кейин футболчиларни ўзларига ҳам айтгандим. Аммо биз сўнгги ўнйилликдаги энг яхши жамоага қарши ўйнадик ва бу осон бўлмаслигини билардик. Бир неча йил олдин "Ман Сити"га қараб, улардан қанчалик ортда эканимизни ҳис қилардик. Ҳозир биз улар билан бир даражадамиз. Ҳеч бўлмаса, уларга жуда яқин келдик. Натижа сабаби – рақиб биздан ҳужумда унумлироқ ўйнагани".
ИСМАТОВ Ж.
