ЎФФ матбуот котиби Санжар Ризаевнинг твиттерда ёзган хабарларига кўра, бугун куннинг биринчи ярмида 7 сентябрь куни бўлиб ўтадиган Ўзбекистон ва Қувайт терма жамоалари ўртасидаги ўртоқлик учрашуви олдидан ҳар иккала терма жамоанинг расмийлари ўртасида учрашув бўлиб ўтган.
Учрашувда Ўзбекистон терма жамоаси оқ, Қувайт терма жамоаси эса қизил кийимда майдонга тушиши аниқ бўлди.Томонларнинг ҳар бири 7тадан ўйинчи алмаштириш ҳуқуқига эгалар.
ТЖМ раиси Асқар Толибжоновнинг сўзларига қараганда, ўртоқлик учрашувини ФИФА рефериси Равшан Эрматов бошқаради.
Шунингдек, ушбу ўртоқлик учрашуви олдидан матбуот анжумани ўтказилмаслиги ҳам хабар қилинмоқда.
"Ўзбекистон" меҳмонхонасида истиқомат қилаётган терма жамоамиз назарий машғулотлар ўтказди. Жисмоний машғулотларни эса терма жамоамиз бугун кеч соат 17.30да "Пахтакор" стадионида ўтказади. Қувайт терма жамоасининг бундай машғулоти эса 18:30га белгиланди.
