«Реал»нинг франциялик ярим ҳимоячиси Эдуардо Камавинга ўзининг универсаллиги ҳақида тайёрланган қизиқарли видеороликка дарҳол муносабат билдирди.
Энди мухлисларнинг мавзу юзасидан мемлари тўлқинини тўхтатиб бўлмаяпти...
Камавинга чиндан ҳам, кўп қиррали футболчи. Яқинда ижтимоий тармоқда унинг универсал хусусияти бироз бўрттирилган ажиб видеоролик тарқалди. Унда муаллиф франциялик футболчи «Реал»нинг исталган футболчиси ўрнини босиши мумкинлигига шаъма қилган. Яъни Эдуардони нафақат бошқа футболчилар, балки мураббий ва ҳаттоки, ҳакам ролида кўрсатган. Аниқроғи, роликда ҳар бир футболчи ярим ҳимоячи номи билан аталган: Тибо Камавинга, Серхио Камавинга (Рамосга ишора), Зайниддин Камавинга, сэр Алекс Камавинга ва ҳоказо.
Видеоролик бош қаҳрамон томонидан яхши баҳоланди. Ҳар ҳолда, франциялик футболчи унга пост қўйди ва оддий ёзув қўшиб қўйди: «Илтимос, мени тинч қўйинглар...».
Аммо Камавинга бу билан мухлисларни жунбушга солди, гўё. Улар энди ярим ҳимоячининг универсаллиги ҳақида мемлар яратишга тушдилар. Кимдир Эдуардо бутун жамоа ўрнини босиши мумкинлигини ифода этаётган бўлса, яна биров футболчини мураббий ролида кўряпти:
- Анчелотти истеъфога чиқса, муаммо йўқ.
- Дарвозада Кепадан яхшироқ.
- У ҳатто Перес ўрнини ҳам боса олади.
- Трансплантацияга эҳтиёж сезсам, шу йигит юрагини олардим...
- «Реал Камавинга Мадрид»...
