Ярим ҳимоячи Тангуй Ндомбеле «Тоттенхэм»дан «Галатасарой»га ўтади.
Клублар 26 ёшли франциялик футболчини сотиб олиш шарти билан ижарага олиш борасида келишиб олди.
Нуфузли инсайдер Фабрицио Романонинг ижтимоий тармоқларда хабар беришича, Ндомбеле аллақачон тиббий кўрикнинг биринчи қисмидан ўтган. Душанба куни футболчи Истанбулга учиб кетади.
Айтиш жоизки, сўнгги бир ярим йил ичида Ндомбеле «Тоттенхэм»дан икки марта – аввалига «Лион»га, кейин эса «Наполи»га ижарага берилганди.
Қўшимча қиламизки, нуфузли Transfermarkt портали мутахассислари Тангуй Ндомбелени 22 миллион еврога баҳоламоқда.
