«Милан» ҳужумчиси Лука Йовичнинг агенти Фали Рамадани «Локомотив» ўз мижозига қизиқиш билдираётгани ҳақидаги маълумотга изоҳ берди.
«Булар шунчаки миш-мишлар, эътибор берманг», - деди футболчининг агенти.
Аввалроқ сербиялик футболчининг «Локомотив»га ўтиши мумкинлиги ҳақидаги маълумотни «Милан» ҳам рад этганди.
Жорий мавсумда 25 ёшли Йович «россонерилар» сафида еттита ўйинда майдонга тушди ва унда бирорта ҳам самарали ҳаракат қила олмади.
Transfermarkt портали Сербия терма жамоаси футболчисини 8 миллион еврога баҳоламоқда.
