Португалиялик ҳимоячи Жоау Канселу айни дамда "Барселона"да ижара асосида ўйнамоқда. Футболчининг шартномаси “Манчестер Сити”га тегишли.
Football Espana хабарига кўра, инглиз гранди ўз футболчиси билан 50 миллион евро эвазига хайрлашишга тайёр, аммо бу маблағ "Барселона"га тўғри келмайди. Манбага кўра, каталонияликлар 29 ёшли Канселуни келаси мавсум учун ижара муддатини узайтирмоқчи. Маълум қилинишича, шартномада ижара муддати тугаганидан кейин футболчини мажбурий сотиб олиш банди бўлса, "Манчестер Сити" шундай қадам ташлаши мумкин.
Жорий мавсумда Канселу барча турнирларни ҳисобга олган ҳолда 14 та учрашувда майдонга тушиб, икки бор гол урди ва битта голли узатмани амалга оширди.
