Россия футболига алоқадор ўйинчиларнинг ҳуқуқи поймол бўлди.
ЖЧ-2022да РПЛ футболчиларининг иштироки учун бериладиган пул блокланди. Бу ҳақда РФИ бош котиби Максим Митрофанов маълум қилди.
«Ҳозирча футболчиларнинг ЖЧ-2022даги иштироки учун пуллар блокланган. ФИФА бу пулни клубларимиз санкциялар остида қолгани учун юбормаяпти», - деди Митрофанов.
Октябрь ойида ФИФА клубларга футболчиларнинг Қатардаги жаҳон чемпионатидаги иштироки учун 209 миллион доллар товон пули тўлашини айтган эди. Қайд этилишича, футболчининг турнирдан олдинги икки йил давомида ўйнаган барча клубларига товон пули тўланади.
Қатарда «Динамо»нинг камерунлик ярим ҳимоячиси Муми Нгамале, шунингдек, уругвайлик ҳимоячи Гильермо Варела ва ҳуқуқлари «оқ-кўклар»га тегишли бўлган польшалик ярим ҳимоячи Себастьян Шиманскилар иштирок этишди.
Шунингдек, Жаҳон чемпионатининг бронза медали соҳибига айланган «Зенит»нинг собиқ футболчилари – Деян Ловрен ва Никола Влашичлар ҳам ушбу қарорнинг қурбони бўлди.
