Мадриднинг "Атлетико" клуби ҳимоячиси Сезар Аспиликуэта бош мураббий Диего Симеоненинг талаблари ҳақида гапирди. Эслатиб ўтамиз, испаниялик футболчи шу ёздан бошлаб "матрасчилар" сафида ўйнамоқда ва "Челси"дан эркин агент сифатида келиб қўшилган эди.
"Симеоне ҳар куни ўз футболчиларидан кўп нарсани талаб қилади. У ҳар бир машғулотда барқарорликни кўришни истайди. Менга бу ёндашув ёқади, чунки сиз ҳафта бўйи чала машқ қилиб, дам олиш кунида майдонга чиқиб, яхши ўйин кўрсата олмайсиз. Машғулотлар пайтида ҳам худди ўйиндагидек бор кучингизни беришингиз керак", - деди Аспиликуэта Marca нашрига.
