"Рома" ҳужумчиси Пауло Дибала жамоанинг собиқ бош мураббийи Жозе Моуриньо ва римликларнинг ҳозирги бош мураббийи Даниэле Де Россини солиштирди.
Де Росси тайинланганидан кейин жамоа кетма-кет учта ғалабага эришди.
“Кўп нарса ўзгарди. Де Росси Моуриньодан жуда фарқ қилади. Жамоада нима учун муаммолар борлигини ҳам ўзимиз тушуниб олдик. Де Росси жамоани ва шаҳарни ҳаммадан кўпроқ билади. У “Рома”га иштиёқ олиб келди, кўп нарсаларни тушунишимизга ёрдам берди ва ниҳоят, анчадан бери исботлай олмаганимиз нималарга қодир эканимизни кўрсатдик. Ўйлайманки, ўйинлар орасидаги пауза бизга Де Россининг ғояларини яхшироқ тушунишга ёрдам берди", - дея Дибаланинг сўзларини келтиради Football Italia.
"Рома" 23 турдан кейин 38 очко билан А Серия турнир жадвалида бешинчи ўринда бормоқда.
