29 март, жума куни "Пахтакор" олий лиганинг тўртинчи турида "Металлург" меҳмони бўлади. Бекободликлар ҳозирча 3 учрашувда 7 очко тўплаб, ўз дарвозаларидан тўп ўтказиб юборишмади. Фарғонада "Нефтчи"ни 1:0 ҳисобида доғда қолдириб қайтишгани ҳам Рустам Мирсодиқов шогирдларининг жорий мавсумни кўтаринки кайфиятда ўтказаётганини исботлайди. Ҳар икки жамоа таркибида муҳим ўйин олдидан йўқотишлар мавжуд эмас. Мурод Исмоилов бошчилигидаги "шерлар" 21 март санасидан буён ушбу баҳсга жиддий тайёргарлик кўришмоқда.

Ҳозирга қадар олий лигада клублар 30 бор тўқнаш келишган. 24 учрашувда "Пахтакор", 2 беллашувда "Металлург" зафар қучган. 4 баҳс дуранг билан тугаган. Футболчиларимиз 82 бор рақиб дарвозасига гол уриб, 18 тўп ўтказиб юборганлар. Ўзаро ўйинларда яққол устунлик жамоамиз тарафида эканлигини кўриш мумкин. Ўтган йилги беллашувларда "Пахтакор" Тошкентда 5:0, Бекободда 2:1 ҳисобида ғалаба қозонган.

Ёшлар таркиблари 28 март куни Анатолий Анохин номли стадионда соат 15:00да ўйинларини бошлашади. Асосий таркиблар эса 29 март, жума куни "Металлург"нинг ўтган йили ишга туширилган янги стадионида соат 16:00да учрашувни бошлаб беришади. "Пахтакор"нинг асосий таркиби баҳсда оқ рангли либосларда майдонга тушади.

«Металлург» (Бекобод) – «Пахтакор» (Тошкент)
Ҳакамлар: С.Зайлобиддинов (Фарғона), О.Абдувосилов (Тошкент), О.Дачев (Тошкент), А.Рубаков (Тошкент).
Назоратчи: Г.Имомов (Тошкент).