Париж клуби “Наполи” ҳужумчиси Хвича Кварацхелияга мавсумига 7,5 миллион евро маошни ўз ичига олган 5 йиллик шартнома таклиф қилди, дея хабар беради La Gazzetta dello Sport.
Нашрнинг ёзишича, ой бошида "ПСЖ" грузиялик футболчининг агенти Мамука Жугели билан бир неча бор алоқага чиққан ва бу таклиф футболчининг атрофидагилар томонидан маъқулланди.
Шу билан бирга, “Наполи” ва бош мураббий Антонио Конте Кварацхелияни жамоада сақлаб қолиш учун уринишларни давом эттирмоқда.
Клуб футболчи учун янги шартнома лойиҳасини тайёрлади, унга кўра унинг маоши уч баравар кўпаяди (бонуслар билан йилига 1,5 миллиондан 5 миллионгача).
Бундан ташқари, келишув ҳамкорликни 2028 йилгача узайтириш, шунингдек, 120 миллион евродан ортиқ миқдорда товон тўлаш бандини киритишни назарда тутади.
«ПСЖ» айни дамда футболчининг трансфери учун «Наполи»га 100 миллион евро таклиф қилмоқда.
