«Бавария» марказий ҳимоячиси Дайо Упамекано Франция терма жамоасининг октябрь ойидаги ўйинларини ўтказиб юбориши мумкин.
25 ёшли футболчи якшанба куни бўлиб ўтган Бундеслига доирасидаги Франкфуртнинг «Айнтрахт» клубига қарши ўйинда (3:3) гол урди, аммо жароҳати сабаб учрашувни якунлай олмади. "L'Equipe" нашри хабарига кўра, Упамеканонинг тиззасида муаммо бор ва у аллақачон жароҳатнинг оғирлигини аниқлаш учун тиббий кўрикдан ўтган. Синов натижалари футболчининг октябрь ойидаги Миллатлар лигаси ўйинлари учун Франция терма жамоасига бора олмаслигини кўрсатади.
Франция терма жамоаси Исроил ва Бельгия терма жамоаларига қарши баҳс олиб боради. Учрашувлар мос равишда 10 ва 14 октябрь кунлари бўлиб ўтади.
