Мюнхеннинг "Бавария" клуби ҳимоячиси Альфонсо Дэвис 22 январь куни бўлиб ўтган Чемпионлар лигаси доирасида "Фейеноорд"га (0:3) қарши ўйинда олган жароҳати туфайли 4-6 ҳафта майдонга туша олмаслиги мумкин. Бу ҳақда «Sport Bild» хабар берди.
Манба берган хабарга кўра, футболчининг жароҳати аввал тахмин қилинганидан ҳам жиддийроқ бўлиб чиқди. Ҳимоячининг чап сон пайида мушаклари йиртилгани аниқланган. Аввалроқ Дэвиснинг мускули чўзилиб кетгани ва тахминан икки ҳафта майдонга тушмаслиги хабар қилинганди. Ҳимоячининг март ойида бошланадиган Чемпионлар лигаси 1/8 финал ўйинларида иштирок этиши ҳам сўроқ остида.
Альфонсо Дэвис жорий мавсумда "Бавария" сафида барча турнирларда 25 та ўйин ўтказиб, битта гол урган.
