Ҳужумчи Муҳаммад Салоҳ "Ливерпуль" билан янги меҳнат шартномасини имзолади. Томонлар ўртасидаги шартнома 2027 йилнинг ўрталарига қадар мўлжалланган.
The Telegraph журналистлари маълумотига кўра, мисрлик ҳужумчининг маоши йилига 20 миллион долларни ташкил этади. Шунингдек, шартномада самарадорлик учун бонус тўловлари белгиланган.
Муҳаммад 2017 йилдан буён "Ливерпуль" шарафини ҳимоя қилиб келмоқда. Умумий ҳисобда ҳужумчи мерсисайдликлар сафида 394 та ўйин ўтказиб, 243 та гол урган ва 111 та голли узатмани амалга оширган.













