"Манчестер Сити" ва Португалия терма жамоаси ярим ҳимоячиси Бернарду Силва туманли Альбионни тарк этиши мумкин. Юлдуз хавбекда Испания чемпионатининг топ-клубларидан бирига ўтиш варианти бор.

Todofichajes нашри тарқатган хабарга кўра португалиялик хавбек хизматига Каталониянинг "Барселона" клуби қизиқиш билдирмоқда. Transfermarkt портали футболчининг бозор нархини 45 миллион еврога баҳоламоқда. Бернардунинг "шаҳарликлар" билан амалдаги шартномаси 2026 йилнинг июнь ойи охирида якунига етади.

Жорий мавсумда Бернарду Англия чемпионатида 27 та ўйин ўтказиб, 2 та гол урди ва 4 та голли узатмани амалга оширди.