"Атлетико"нинг бразилиялик вингери Самуэль Лино яқин ойларда клубини ўзгартириши мумкин, дея хабар бермоқда Fichajes нашри. Мадридликлар трансфер суммаси 30 миллион еврога яқинлашса, футболчини сотишга тайёр.

У тезкорлиги, дриблинги ва ҳимояни ёриб ўтиш қобилиятига қарамай, асосий таркибга мустаҳкам ўрнашиб ололмади. "Атлетико"дек талабчан клубда барқарорлик жуда муҳим ва айнан шу нарса бразилияликка етишмаяпти.

Бир неча хориж клублари, айниқса, АПЛдагилар аллақачон Линонинг ҳолатига қизиқиш билдиришган. "Атлетико" раҳбарияти бу футболчи орқали пул ишлаш учун яхши имконият деб ҳисобламоқда.

Қўшимча қиламизки, 2024/25 йилги мавсумда Лино "Атлетико" сафида барча мусобақаларда 47 та ўйинда майдонга тушиб, 4 та гол ва 8 та голли узатмани амалга оширди.