"Манчестер Юнайтед" жорий трансфер ойнасидаги асосий мақсадини белгилаб олди - клуб "Милан"нинг қанот ҳужумчиси Рафаэль Леау билан шартнома имзолашни мақсад қилган.
Бу ҳақда Caught Offside нашри хабар бермоқда. Манбага кўра, инглиз клуби 60 млн фунт атрофида расмий таклиф билан чиқишга тайёргарлик кўрмоқда. Шу билан бирга, "Милан" келишув суммаси 68-85 млн фунт стерлинг оралиғида бўлса, 26 ёшли португалияликни сотиш имкониятини кўриб чиқмоқда. Футболчи учун курашда манкунианликларга "Арсенал" ва "Челси" рақобатчи бўлиши мумкин.
Қайд этилишича, "канонирлар" аллақачон Леау вакиллари билан музокараларга киришган. Ўтган мавсумда футболчи "россонерилар" сафида барча мусобақаларда 50 та ўйинда майдонга тушиб, ўз ҳисобига 12 та гол ва 13 та голли узатмани ёздириб қўйди. Футболчининг "Милан" билан шартномаси 2028 йилнинг ёзигача амал қилади. Transfermarkt маълумотларига кўра, унинг бозор қиймати 70 млн еврога баҳоланмоқда.
