Ўзбекистон терма жамоаси футболчиси Темур Кападзе томонидан киритилган 2та гол "Актобе" жамоасини Европа лигасининг навбатдаги босқичига олиб чиқди. Ўйиндан кейин ҳамюртимиз қисқача интервью берди.

— Темур, сизни ғалаба билан табриклайман, "Актобе" таркибидаги биринчи дублингизми бу?
— Бу йилдаги иккинчи "дубл"им. Бугунги ўйин жудаям муҳим ўйин эди, жамоамиз хам яхши тайёргарлик кўрди ва мухлисларимиз учун ажойиб ўйин намойиш этдик.

— Ўйин осон бўлмади..
— Ҳа албатта, кўряпсиз, жамоамизнинг кайфияти ажойиб, гарчанд улар ҳар икки-уч кунда майдонга тушишга мажбур бўлаётган бўлса-да. Ўйин анча оғир бўлди.

— Яна уч кундан сўнг "Тобол"га қарши майдонга тушасизлар. Ушбу ўйинга қандай тайёргарлик кўраяпсизлар?
— Охирги ўйинлар учун қандай тайёргарлик кўрган бўлсак, шундай тайёрланамиз. Чемпионатда максимал даражада очко йиғишимиз керак. Бундан ташқари биз Европа лигасида ҳам узоққа бормоқчимиз.

— Қайси бири муҳимроқ: Қозоғистон чемпионатими ёки Европа лигасими?
— Иккаласи ҳам муҳим. Буни йигитлар ҳам тушуниб турибди. Ҳар бир ўйинда максимал ҳаракат қиламиз ва турнирларда ғолиб бўлишга эришмоқчимиз.

— Кейинги рақиб хақида маълумот борми?
— Йўқ ҳали. Ўйингача кейинги рақибни яхши ўрганиб оламиз деб ўйлайман.