Мадриднинг "Реал" клуби бразилиялик ҳужумчиси Эндрик қишки трансфер ойнасида жамоани тарк этади. Бу ҳақда нуфузли инсайдер Фабрицио Романо ижтимоий тармоқдаги саҳифасида маълум қилди.
Манбага кўра, Эндрик Бразилия терма жамоаси билан бўлажак жаҳон чемпионатига бориш учун ўйнамоқчи. "Реал" январь ойида футболчини ижарага қўйиб юборишга тайёр. Ҳозирда бир нечта клублар билан музокаралар олиб борилаётгани айтилмоқда.
Эслатиб ўтамиз, 2024 йилнинг ёзида "Реал" Эндрикни 47,5 миллион еврога сотиб олган эди. Жорий мавсумда 19 ёшли ҳужумчи бирор марта майдонга тушмади. Унинг клуб билан шартномаси 2030 йилнинг ярмигача мўлжалланган.
