Португалия футбол федерацияси президенти лавозимида ишлаб келаётган Педру Проэнса ҳужумчи Криштиану Роналдунинг дисквалификациясига изоҳ берди.
40 ёшли футболчи пайшанба куни бўлиб ўтган Ирландияга (0:2) қарши ўйинда тирсаги билан рақибга зарба бергани учун тўғридан-тўғри қизил карточка олди. Дисквалификация туфайли юлдуз форвард ЖЧ-2026 финал босқичи стартини ўтказиб юбориши мумкин.
"Роналдунинг жазоси иложи борича енгилроқ бўлиши учун қўлимиздан келганини қиламиз. Биз аллақачон вазиятни ҳуқуқий нуқтаи назардан таҳлил қилдик. Умид қиламизки, дисквалификация барча енгиллаштирувчи ҳолатларни ҳисобга олган ҳолда минимал, қоидаларга мувофиқ бўлади. Барчамиз Криштиану ЖЧ-2026нинг илк ўйинида майдонга тушишини истаймиз," - деди Проэнса.
Якшанба куни португалияликлар Роналдусиз Арманистон терма жамоасини мағлуб этиб (9:1), мундиалга тўғридан-тўғри йўлланмани қўлга киритди.
