«Реал Мадрид» клуби ҳужумкор ярим ҳимоячи Франко Мастантуононинг истиқболига қаттиқ ишонмоқда. 18 ёшли аргентиналик иқтидор ўтган йилнинг ноябрь ойида чов соҳасидан жароҳат олиб, 4 та ўйинни ўтказиб юборган эди. Шундан сўнг, у ўша пайтдаги бош мураббий Хаби Алонсо қўл остида камроқ майдонга туша бошлаган эди. Бироқ, Алонсонинг ўрнини эгаллаган Альваро Арбелоа Франкони яна асосий таркибга қайтарди.

«As» нашрининг хабар беришича, клуб Мастантуононинг ёшига нисбатан анча вазмин ва мулоҳазали эканини юқори баҳолайди. «Ривер Плейт»дан 60 миллион евродан кўпроқ маблағ эвазига сотиб олинган футболчи, худди ўтган ёзда келган бошқа ёш ўйинчилар каби, узоқ муддатли лойиҳанинг бир қисми ҳисобланади.

Арбелоа ва «Мадрид» раҳбарияти футболчига тўлиқ далда бермоқда, бу эса унинг руҳиятини кўтармоқда. Мастантуононинг асосий мақсади — ЖЧ-2026да Аргентина терма жамоаси сафида иштирок этиш. Маълумот учун, у жорий мавсумда Ла Лигада 14 та ўйинда майдонга тушиб, 1 та гол урди ва 4 та сариқ карточка олди.