Мадриднинг «Атлетико» клуби устози Диего Симеоне «Барселона»га қарши ўйиндаги (4:0) ҳужумчи Хулиан Альвареснинг ҳаракатлари ҳақида ўз фикрлари билан ўртоқлашди.
26 ёшли форвард Испания Кубогининг дастлабки ярим финал баҳси қаҳрамонларидан бирига айланди: у 33-дақиқада Адемола Лукманга голли узатма етказиб берди, танаффус олдидан эса ўз номини таблога ёздириб қўйди. Аргентиналик учун бу гол сўнгги икки ойдан кўпроқ вақт ичидаги биринчиси бўлди — у бундан олдинги 11 та учрашувда бирор марта ҳам рақиб дарвозасини ишғол эта олмаган эди.
"Альвареснинг Лукманга берган голли узатмаси фантастик чиқди. Хулиан гол уришга ҳам муваффақ бўлди ва мен унинг ниҳоят (голларга) қайтганидан хурсандман. Ишончим комил, бундан кейин унга гол уриш анча осонлашади", — деди Симеоне ўз интервьюсида.
Якшанба куни «матрасчилар» Ла Лига доирасида «Райо Вальекано»га қарши майдонга тушишади. «Барселона» билан жавоб ўйини эса 3 март куни бўлиб ўтади.
