"Будё-Глимт" клуби устози Кьетил Кнутсен жамоанинг уй стадионидаги сунъий майдон манзилига айтилган танқидларга ўз муносабатини билдирди. Аввалроқ, Чемпионлар лигаси доирасида Норвегия жамоасига 1:3 ҳисобида имкониятни бой берган Миланнинг "Интер" клуби майдон ҳолати устидан шикоят қилган эди.
"Мен бу борада ҳеч нарса қила олмайман. Биз фақат ўзимиз таъсир ўтказа оладиган жиҳатларга эътибор қаратишимиз керак. "Манчестер Сити" майдон ҳақида тўхталиб ўтирмади, улар шунчаки бизни мақташди", — дея Кнутсеннинг сўзларидан иқтибос келтиради журналист Даниэле Мари.
Эслатиб ўтамиз, "Будё-Глимт" ўз уйида "шаҳарликлар"ни ҳам худди "Интер" билан бўлган ўйиндаги каби натижада мағлуб этган эди.
"Энди меҳмонда ўйнаймиз ва энди биз учун ноодатий майдон тури бўлади", — дея қўшимча қилди Кнутсен.
"Интер"га қарши жавоб учрашуви 24 февраль куни бўлиб ўтади. Ўйин Тошкент вақти билан соат 01:00 да бошланади.
