Пайшанба куни Европа лигасида "Ноттингем Форест" ва "Фенербахче" жамоалари ўртасида жавоб учрашуви бўлиб ўтди. Туркиядан келган меҳмонлар 2:1 ҳисобида ғалаба қозонишди, бироқ ўз уйларидаги биринчи ўйинда 0:3 ҳисобида мағлуб бўлишгани сабабли мусобақани тарк этишди.
Ижтимоий тармоқларда "Сити Граунд" стадионидан олинган суратлар тарқалди. Уларда меҳмонлар секторидаги кўплаб ўриндиқлар синдириб ташланганини кўриш мумкин. Кўринишидан, "Фенербахче" мухлислари жамоанинг мусобақадан чиқиб кетганидан ғазабланиб, аламларини ўриндиқлардан олишган.
Эндиликда Туркия клуби етказилган зарарни қоплаб беришига тўғри келиши эҳтимоли катта. Агар барча зарарлар қайд этилган бўлса, якуний қарорни УЕФА қабул қилади.
