Аргентиналик ҳужумчи Анхель ди Мария дунёнинг энг иқтидорли футболчиларидан бири сифатида тан олинган бўлса-да, унинг қобилияти ҳамма вақт ҳам муносиб баҳоланмаган. Ди Мариянинг эслашича, унга айниқса «Манчестер Юнайтед»да, ўзининг оғир характери билан танилган Луи ван Гал қўл остида ўйнаш жуда қийин кечган.

«Мен гол урардим, голли узатмалар амалга оширардим, лекин ван Гал мени ҳеч қачон мақтамасди. У фақат менинг хатоларимни муҳокама қиларди, холос. Агар ўйинчи бир мартадан кўп хато қилса, у ўша учрашувни муваффақиятсиз деб ҳисобларди. Якунда бу менинг ўзимга бўлган ишончимни сўндириб қўйди», — дея ди Мариянинг сўзларини келтиради «derbyderbyderby.it».

Маълумот учун, Анхель ди Мария ҳозирда ўзининг қадрдон жамоаси — Аргентинанинг «Росарио Сентраль» клубида тўп сурмоқда. Унинг ўзига бўлган ишончи эса 2022 йилги Жаҳон чемпионлиги ва кетма-кет қўлга киритилган Америка Кубогидаги ғалабалардан сўнг тўлиқ тикланган бўлса ажаб эмас.