"Манчестер Сити" бош мураббийи Хосеп Гвардиола Чемпионлар лигаси 1/8 финали доирасидаги "Реал"га қарши жавоб ўйини олдидан ўз фикрлари билан ўртоқлашди. Мадриддаги 0:3 ҳисобидаги мағлубиятдан сўнг "шаҳарликлар" вазиятни ўнглашлари керак.

Матбуот анжуманида Гвардиолага бундан уч йил аввал "Манчестер Сити" "Реал"ни 4:0 ҳисобида мағлуб этганини эслатиб ўтишди.

"Менга: «Йигитлар, дастлабки 20 дақиқада учта гол уришимиз керак», дейиш жуда осон. Ҳа, бу ажойиб эшитилади. Аммо реаллик бутунлай бошқача. Биз ўз ёндашувимизда, ишлаётган барча жиҳатларимизда барқарор бўлишимиз керак. Эртага охиригача нима қилишимиз кераклиги ҳақида гаплашиб оламан. Агар ўхшамаса, демак, биринчи ўйиндаги натижа энг яхшиси бўлмаган.

Рақиб ҳақиқатан ҳам кучли. Биз буни тан олишимиз керак. Албатта, вазиятни ўзгартириш учун кўпроқ таваккал қилишга мажбурмиз. Ҳатто биринчи бўлимдаги натижа унчалик яхши бўлмаса ҳам, биз шу руҳда давом этишимиз керак. Нима содир бўлишини ҳеч қачон олдиндан билиб бўлмайди", — деди Гвардиола журналистларга.