Лондоннинг «Арсенал» клуби Англия Лига кубоги финалида «Манчестер Сити»га икки тўп фарқи билан имкониятни бой берди.
Маълум бўлишича, Англия чемпионати пешқадами охирги марта барча мусобақаларни ҳисобга олганда бир тўпдан ортиқ фарқ билан бундан бир йил олдин — 2025 йилнинг февралида, роппа-роса 410 кун аввал мағлуб бўлган эди.
Қизиғи шундаки, ўшанда ҳам бу ҳолат Англия Лига кубогида юз берган ва Микель Артета жамоасини «Ньюкасл» ранжитган эди.
Яқин орада ушбу клублар, «Арсенал» ва «Манчестер Сити» Англия чемпионатининг 33-тури доирасида 18 апрель куни яна ўзаро тўқнаш келишади. Эслатиб ўтамиз, айнан «шаҳарликлар» турнир жадвалида «Арсенал»нинг асосий рақиби ҳисобланишади.
