Ҳужумчи Антуан Гризманн «Орландо Сити»да йилига тахминан 10 миллион евро маош олади. Бу ҳақда журналист Фабрис Хокинс хабар бермоқда.

Хокинс ушбу сумма солиқлар ҳисоблангунга қадарми ёки ундан кейинги тоза даромадми — бунга аниқлик киритмаган. Capology маълумотларига кўра, ҳозирда Гризманн Ла Лигада солиқлар билан бирга йилига 9,38 млн евро (солиқлардан ташқари — 4,5 млн евро) маош олмоқда.

Аввалроқ 35 ёшли француз МЛС клуби билан икки йиллик шартнома имзолаши маълум бўлган эди. У «Орландо Сити» сафига жорий мавсум якунланганидан сўнг бориб қўшилади.

Ушбу мавсумда Гризманн Ла Лиганинг 26 та ўйинида 6 та гол урди ва 1 та голли узатмани амалга оширди.