Италия терма жамоаси бош мураббийи Женнаро Гаттузо Шимолий Ирландияга қарши ўтиш ўйини олдидан журналистлар билан суҳбатлашди.
Жамоалар ЖЧ-2026 йўлланмаси учун плей-офф ярим финали доирасида тўқнаш келишади. Учрашув пайшанба куни Бергамо шаҳрида бўлиб ўтади.
«Бу ўйинда жуда кўп нарса тикилган. Бутун Италия бизга умид боғламоқда. Тўғрисини айтсам, охирги ойларда кўчада мени тез-тез тўхтатиб, терма жамоамизни Жаҳон чемпионатига олиб чиқишимни сўрашмоқда. Мен босимларга ўрганиб қолганман, лекин бу фаолиятимдаги энг муҳим ўйин», — дея Гаттузонинг сўзларини келтиради Calciomercato.
Ўйиннинг бошланиши Тошкент вақти билан тунги соат 00:45 га режалаштирилган. Ушбу жуфтлик ғолиби финалда Уэльс ёки Босния ва Герцеговина терма жамоаси билан тўқнаш келади.
