Италия терма жамоаси собиқ ярим ҳимоячиси Массимо Амброзини жорий мавсумда «Милан»нинг француз футболчилари — Адриен Рабьо ва Майк Меньяннинг ўйинлари ҳақида ўз фикрлари билан ўртоқлашди.
«Менимча, Рабьо ва Меньян «Милан» учун жуда муҳим аҳамиятга эга бўлишди. Меньян мавсум бошидан бери жамоага 8 ёки 9 очко келтирди — унинг сейвлари шунчаки ақл бовар қилмас даражада эди», — дея Амброзинининг сўзларини келтирмоқда GFFN.
«Рабьо жамоа менталитетини бутунлай ўзгартириб юборди. Биз Италияда «Милан» тўплаган ўртача очколар ҳақида гапирамиз. Рабьо майдонда бўлганида, жамоа ҳар ўйинда ўртача 2,45 очко жамғармоқда, у бўлмаганида эса бу кўрсаткич 1,5 дан камни ташкил қилади. Ҳайратланарли», — дея таъкидлади Амброзини.
30 ёшли Рабьо жорий мавсумда 24 та учрашувда 5 та гол урди ва 5 та голли узатмани амалга оширди. Унинг тенгдоши Меньян эса 33 та ўйинда майдонга тушиб, 26 та гол ўтказиб юборди ва 14 маротаба ўз дарвозаси дахлсизлигини сақлаб қолди.
