"Манчестер Сити" ёзги трансфер ойнасида таркибни янгилашга тайёргарлик кўрмоқда. The Touchline нашри берган хабарга кўра, Премьер-лига гранди ҳимоячи Джон Стоунсга янги шартнома таклиф қилмоқчи эмас.
Катта эҳтимол билан, футболчи жорий мавсум якунлангач, эркин агент мақомида клубни тарк этади. Май ойи охирида Стоунс 32 ёшга тўлади. Эслатиб ўтамиз, Джон 2016/2017 йилги мавсум бошидан бери "шаҳарликлар" шарафини ҳимоя қилиб келади. Ўшандан бери у 292 та расмий ўйинда майдонга тушиб, 19 та гол ва 9 та голли узатмани ўз ҳисобига ёздириб қўйган.
Ҳозирда "Манчестер Сити" Премьер-лига турнир жадвалида иккинчи ўринда бормоқда. Хосеп Гвардиола жамоаси битта захира ўйинига эга бўлган ҳолда, пешқадам "Арсенал"дан тўққиз очкога ортда қолмоқда.
