«Барселона» бош мураббийи Ханси Флик Барселонада бўлиб ўтган Испания ва Миср терма жамоалари ўртасидаги ўйинда (0:0) янграган «Кимки сакрамаса, у мусулмон» қабилидаги ҳайқириқлар ҳақида ўз фикрини билдирди.

Ўйиндан сўнг «Барса» ва Испания терма жамоаси вингери Ламин Ямал шундай деб ёзган эди: «Бу ҳайқириқлар рақиб жамоага қаратилганини ва шахсан менга алоқадор эмаслигини биламан. Бироқ мен мусулмон сифатида буни ҳурматсизлик ва мутлақо қабул қилиб бўлмайдиган ҳолат деб ҳисоблайман».

«Ламин ажойиб баёнот берди. Футбол оламида биз ҳаммани бирдек қабул қилиш тарафдоримиз. Бу жуда маҳзун ҳолат ва фақат бир ҳовуч аҳмоқларгина буни тушунишмаяпти.

Мулоҳаза юритиш ва хатоларни тузатиш вақти келди. Нафақат футболда, балки ҳаётда ҳам ирқчиликка ўрин йўқ. Гап ҳаммамиз ҳақимизда, бирдамлик ҳақида кетмоқда. Теримизнинг ранги, ирқимиз ёки динимиздан қатъи назар, барчамиз ҳурмат қилинишни истаймиз.

Биз ирқчиликни хоҳламаймиз. Фикрлаш тарзини ўзгартириш вақти келди», — деди Флик.