Ўтган йили «Наполи» сафига бориб қўшилган бельгиялик ярим ҳимоячи Кевин Де Брюйне бундай қарорга келишининг сабабларини тушунтириб берди. Унинг сўзларига кўра, Неаполь унинг оиласи яшаши учун энг мақбул жой ҳисобланади.
«Бу юқори даражадаги рақобатбардош футбол ўйнашда давом этишим мумкин бўлган энг яхши макон. Менинг кичик ёшли фарзандларим бор ва мен улар учун энг қулай бўлган жойни қидирган эдим. Бу ерда менталитет Англиядагидан фарқ қилади, об-ҳаво бошқача, одамларнинг турмуш тарзи ҳам ўзгача. Бу бизга жуда ёқмоқда. Мослашиш жараёнида айрим қийинчиликлар бўлди, аммо ҳозирда ҳамма бахтли», — дея Де Брюйненинг сўзларини келтирмоқда calcionapoli1926.it.
Эслатиб ўтамиз, бельгиялик футболчи бунгача ўн йил давомида Англияда яшаган ва тўп сурган эди.
