Мадриднинг "Реал" клуби ярим ҳимоячиси Орельен Тчуамени Чемпионлар Лигаси чорак финали доирасида "Бавария"га қарши кечган биринчи ўйинда олган сариқ карточкаси ҳақида гапирди. Француз футболчиси 37-дақиқада огоҳлантирилди — бунинг натижасида у Мюнхендаги жавоб учрашувини ўтказиб юборади.
"Билмадим, мен шунчаки югураётгандим ва тўпни олиб қўйишга ҳаракат қилмадим, лекин ҳакам қоида бузилишини кўрди. Менимча, у сариқ карточка кўрсатишни хоҳлаганди, чунки бунгача фоллар кўп бўлганди. Мен бу қарорни тушунмаяпман", — дея Тчуаменининг сўзларини келтиради Madrid Universal.
"Сантьяго Бернабеу"даги баҳс "қаймоқранглилар"нинг 1:2 ҳисобидаги мағлубияти билан якунланди. Кейинги чоршанба куни "Альянц Арена"да жавоб ўйини бўлиб ўтади.
