«Манчестер Сити» бош мураббийи Хосеп Гвардиола АПЛ доирасида «Челси»га қарши бўлиб ўтадиган муҳим баҳс олдидан ўз фикрларини билдириб ўтди.
«Шаҳарликлар» учун сафарда кечадиган ушбу учрашув якшанба куни Тошкент вақти билан соат 20:30 га белгиланган.
«Агар биз «Стэмфорд Бридж»да ғалаба қозона олмасак, унда кейинги «Арсенал»га қарши ўйин олдидан матбуот анжумани ўтказишингизга ҳожат қолмаслиги мумкин, чунки ҳаммаси тугаган бўлади. Буни ҳамма тушуниб турибди. Сиз ҳам, мен ҳам, футболчилар ҳам — ҳамма билади», — дея Гвардиоланинг сўзларини келтирмоқда City Xtra.
Эслатиб ўтамиз, шанба куни «Арсенал» ўз майдонида кутилмаганда «Борнмут»га имкониятни бой берди (1:2). Ҳозирда «Сити» пешқадам «канонирлар»дан 9 очко ортда қолмоқда, бироқ Гвардиола шогирдлари ихтиёрида иккита захира ўйини бор. 19 апрель куни эса ушбу икки жамоа ўзаро тўқнаш келишади.
