Англия чемпионатида лигада жон сақлаб қолиш учун курашаётган «Ноттингем Форест» навбатдаги учрашувини кўтаринки руҳда ўтказди ва «Сандерленд» дарвозасига жавобсиз бешта гол урди. Ушбу баҳс ҳақида «ўрмончилар» ҳужумчиси Крис Вуд ўз фикрларини билдирди.

«Жуда ёқимли ўйин ва натижа бўлди. Айниқса, биринчи бўлим шунчаки фантастик ўтди, ҳамма нарса кўнгилдагидек чиқди. Гол уриш менга завқ бағишлайди, айниқса анчадан бери гол урмаётганимни инобатга олсак. Мавсум осон кечмади, лекин ҳозир биз юксалишдамиз. Шунга қарамай, лигада қолиш учун кураш давом этмоқда, ҳали ҳеч нарса ҳал бўлгани йўқ», — дея футболчининг сўзларини келтиради BBC Sport.

Маълумот учун, «Ноттингем Форест» жамоасининг жорий мавсумда яна тўртта ўйини қолган.